Joti Kumar Lama Yonjan
गजल
कहाँ पुगें र म कहाँ आएँ त्यो याद छैन
कैले भेटिएँ कैले हराएँ त्यो याद छैन ।
बरू गजल कति लेखें गनेर भन्न सक्छु
नसोध भोटो कति फटाएँ त्यो याद छैन ।
अझै भेटिन्छन् मेरो कथा सुन्न खोज्नेहरू
मैले ककस्लाई के सुनाएँ त्यो याद छैन ।
सम्झन्छु तिमीले दिएका थुप्रै बाचाहरू
तर कसम भने कति खाएँ त्यो याद छैन ।
हिसाब त हैन तर याद छ आफ्नो हार,
त्यसबेला कस्लाई जिताएँ त्यो याद छैन ।
ऐना अगाडि उभिँदा सधैं विचार गर्छु
जीवनभर केके लुकाएँ त्यो याद छैन ।
जब लोकले जडित भन्छ सम्झन खोज्छु
आखिर दीपक कैले निभाएँ त्यो याद छैन ।
लेखक
ज्याेति कुमार लामा
